Lu pubunari (il licantropo)
Candu i lu zèru la luna è
beddha pièna
e a notti fatta sò azzesi li fanàri
muiddèndi peggiu ch'anima in caddèna
esci a pascì, a vosthi un pubunàri.
"Eu l'aggiu visth'affac'a
l'isthaziòni"
m'ha dittu lu baibèri chiddha nòtti
"Ed eu brinchèndi impressa lu baschòni"
m'hani cuntàddu asthri giobanòtti.
E poi chiddhu chi dizi: "Intesu
l'aggiu
ururèndi che lupu di li mònti".
E l'asthru ancòra, pigliaddu lu curàggiu,
"Eu l'aggiu visthu a l'ara di lu pònti".
Insomma, a dilla tutta chisth'isthòria,
la genti un poggareddh'era assusthàdda
e in tutti v'era propriu la timòria
di fa l'incòntru cu l'anima dannàdda.
Allora s'è fuimmadda un'isqhuadrìglia
pinsendi di tintà lu pubunàri
e falli trattamèntu bruscha e sthrìglia
in modu di passalli dugna màri.
Cussì una notti in via di
mammuschòni
li cazziadòri di chiss'òmmu arèsthu
vedini un tari fuggendi da un baschòni
a moda di un bandiddu disonèsthu.
E dai tutti a ischudìllu,
foramàri,
a chissu pobaràcciu disdhicciosu
"Sei tu, dunca, lu diauru pubunàri!
Ti femmu passà noi tuttu lu gosu".
Ma candu l'hani fattu be' a
gigòtta,
lu cabu di l'isqhuadra di li bòia
s'abiza chi, pa' l'anima bigòtta!
Chissu baschòni è lu di casa sòia.
"E tu cosa fazìsthi in
chisthu lòggu?"
dumanda a l'ommu guasi mosthumàri.
E chissu a poi d'abè pinsaddu un pòggu:
"E no lu ve' ch'eu soggu un pubunàri".
Gian Paolo Bazzoni
